Hot!

සිරිසේන කකුලට වෙඩි තබා ගැනීම

කුමන්ත්‍රණයකින් බලය ඇල්ලීම ශ්‍රී ලංකා භුමියේ සිදුවිය නොහැකි දෙයක් ලෙස තරයේ ඇදහූ යුගයක් විය. ඒ යුගය 2018 ඔක්තෝබර් 26 වෙනිදා සවස අවසන් වී ගියේය. 19 වෙනි ආණ්ඩුක්‍රම ව්‍යවස්ථා සංශෝධනය ප්‍රකාරව කළ නොහැකි හා ආචාරධාර්මිකව කළ නොයුතු ක්‍රියාවක් වන බලහත්කාරයෙන් හා වංචනික අන්දමින් අගමැති වරයෙක් පත්කිරීම ජනාධිපති සිරිසේන විසින් කර ඇත. ඔහු එයින් රට ව්‍යවස්ථාමය අර්බුදයකට ඇද දැම්මා පමණක් නොව, රාජපක්ෂ සමයේ ගත් ණය වාරික ගෙවීම, ඇමෙරිකානු ඩොලරයේ අසාමාන්‍ය මිළ විචලනය හා ආනයන-අපනයන පරතරය ආදියෙන් තදින් බැට කමින් සිටි ආර්ථිකයට කණේ පහරක් එල්ල කළේය.


බ්‍රිතාන්‍ය පාර්ලිමේන්තුව රනිල් වික්‍රමසිංහ අගමැති වරයා පිළිගන්නා බව නිවේදනය විය. ශ්‍රී ලංකාවේ නිෂ්පාදනය වන ඇඟලුම් මිළදී ගන්නා ප්‍රධාන රටක් මෙලෙස ප්‍රකාශ කිරීම එම කර්මාන්තය ම අර්බුදයට යැවීමට හේතු විය හැකිය. දැනටමත් තරඟකාරී බංග්ලාදේශය හා වියට්නාමය, කෙටිකාලීනව ඇඟලුම් සැපයුමෙන් ලොකු කුට්ටියක් කඩා ගනු නියතය.


1982 ලාම්පු කළගෙඩි සෙල්ලම හෙවත් 5/6 පාර්ලිමේන්තුවේ කාලය දික් කිරීමට ජේ ආර් ජයවර්ධන යෙදූ උප්පරවැට්ටිය නිසා බෙලහීන වූ ප්‍රජාතන්ත්‍රවාදී ක්‍රියාදාමයන් නිසා ඉන් පසුව රට ඇද වැටුණු අගාධය ඉන්දියානු මැදිහත්වීම දක්වාද, රට දෙකොණ විලක්කුවක් වීම දක්වා ඇදී යෑම දක්වාද දිග්ගැස්සුණු බව ඉතිහාසය දන්නෝ දනිති. එයින් සරම් අඳින පංතිය සේම ටයි දමන පංතිය ද එක සේ පීඩාවට පත් විය.


සිරිසේන ජනාධිපතිවරයා දුරදිග නොහිතා කටයුතු කරන බව කවුරුත් දනී. ඔහුගේ ප්‍රකට ‘පත්තරයෙන් දැනගත්තා’ නම් මුග්ධ ප්‍රකාශය තුළ ඇත්තේ තමන් සතු විශ්ලේෂණ විඥානයක් නැති බවයි. එලෙසම 2015 ජනාධිපතිවරණයෙන් ජයගත් මොහොතේ නැවත තරඟ නොකරන බවට කළ ප්‍රකාශය ද දුරදිග නොහිතා කිරීම ගැන ඔහු දැන් කණගාටු වෙනවා විය යුතුය. එය පැහැදිලිව පෙනී යන්නේ ඔහු බලය අත්හැරීමට යන දේශපාලකයෙකු ගේ ලක්ෂණ නොපෙන්වීමයි.


ආණ්ඩුක්‍රම ව්‍යවස්ථාවේ 19 වන සංශෝධනය සිරිසේන ජනාධිපතිවරයා දෙවරක් තරඟ කිරීම කිසිම අයුරකින් වළක්වන්නේ නැත. නමුත් එය ඔහුට 18 වන සංශෝධනය ආවරණය නොකරන ත්‍රිවිධාකාර ආරක්ෂාවක් සපයයි. එයින් පළමු වැන්න වන්නේ තරඟකාරී ආරක්ෂාවයි, මහින්ද රාජපක්ෂ නැවත තරඟ නොකිරීම යනු ඔහුට තරඟ කරන්න වෙන්නේ අත්දැකීම් අඩු අපේක්ෂකයෙකු සමග වීමයි, එලෙසම එමගින් ශ්‍රීලනිපයේ නායකයා ලෙස ඔහුට නිතරඟ අවකාශයක් විවෘත කර තිබුණි. දෙවැන්න වන්නේ ව්‍යවස්ථාදායක ආරක්ෂාවයි, එමගින් ඔහුට ජනාධිපතිවරයා වශයෙන් කටයුතු කිරීමේ බාධාවක් නොවුන අතර, ඔහුට තමන්ගේ සීමා සලකුණු කිරීම අවශ්‍ය අන්දමට කළ හැකිව තිබුණි. එලෙසම 18 සංශෝධනය විසින් හිටපු ජනාධිපතිවරයා ට ‘යකා නැටීමට’ තිබූ අවස්තාව නැති කර දමා සිරිසේන ජනාධිපතිවරයාට පිරිසිදු ගල්ලෑල්ලක් පවරා තිබුණි. ඔහු එහි ලියාගත්තේ කුමක්දැයි මුළු රටම දැන් දනී.


වඩා වැදගත් හා තීරණාත්මක වන ‘කායික ආරක්ෂාව’ 19 වන සංශෝධනය මගින් සිරිසේන ජනාධිපතිවරයාට පවරා සහතික කර තිබුණේ, ඔහුගේ ආරක්ෂක බලතල වලට කිසිදු අයුරකින් සීමා පැනවීමකින් තොරව හා ආණ්ඩුක්‍රම ව්‍යවස්ථාවේ ‘ජනාධිපති මියගිය විට’ ඇති වන පසු විපාක සම්බන්ධයෙන් බියක් ඇති නොවන අන්දමටය. නමුත් පසුගිය මාස කීපයේ රයිගම අලකේශ්වර ට, චෙන්-හෝ සෙනෙවියා කළ සේ චීන මායමක් ක්‍රියාත්මක විය. එනම්, නාමල් කුමාර හා නාලක සිල්වා කුප්‍රකට කුමන්ත්‍රණය විසින් ගැසූ ගල එහි ඉලක්කය වෙත නිසි ලෙස වැදී ඇත. එයින් සිදුව ඇත්තේ බණ්ඩාරනායක ඝාතනයෙන් පසුව ශ්‍රීලනිපයේ නායකයන් වෙත වැළඳෙන ‘මාව මරාගන්න හදන්නේ, මාව නොමරා මැරුවා’ වැනි සයිකෝසියාවන්ගේ පහසු ගොදුරක් බවට සිරිසේන ජනාධිපතිවරයා පත් වීමයි.


එයින් කලබල වූ සිරිසේන ජනාධිපතිවරයා අපේක්ෂිත ආකාරයටම හැසිරෙමින් කිසිසේත් ජනාධිපති තරඟය ට පැමිණිය නොහැකිව සිටි හිටපු ජනාධිපතිවරයාව වංචනික ලෙස අගමැති ධූරයේ පිහිටවා ඇත. එමගින් සිරිසේන ජනාධිපතිවරයා තමාගේ කායික ආරක්ෂාව තර්ජනයට ලක් කර ගෙන ඇත්තේ හිටපු ජනාධිපතිවරයාට ව්‍යවස්ථාව අනුව ජනාධිපති වීමට ඇති එකම මාර්ගය පහසුවෙන් ඇර දෙමිනි. එය ආණ්ඩුක්‍රම ව්‍යවස්ථාවේ සඳහන් පරිදි ‘ජනාධිපතිවරයා මියගිය විට අගමැති වරයාට ජනාධිපති තනතුරේ දිවුරුම් දිය හැකිය’ යන වගන්තිය අනුප්‍රකාරවයි. මේ මාර්ගයේ යන හිටපු ජනාධිපති කෙනෙකුට නැවත ජනාධිපති තනතුරේ දිවුරුම් දීමට ව්‍යවස්ථාමය බාධාවක් නැත.


දැන් සිරිසේන ජනාධිපතිවරයා සිය අවස්ථාවාදී උපදේශකයින්, මුග්ධ පවුලේ සාමාජිකයින් හා අලුත යාලු වූ පරණ තරහකාරයින් ගේ මිදී පාරට බැසිය යුතුය. ඔහුට හිතවත් කිසිවක් මහපොළොවේ තැන, පෝස්ටර, බැනර, කටවුට් වල ඇත්තේ ‘පොහොට්ටු’ අගමැති කෙනෙකි. දැන් සිරිසේන ජනාධිපතිවරයා ගේ ගේට්ටුව මුර කරන්නේ 2015 ජනවාරි 07 රැයේ ඔහුව මරා දමතියි සිතූ කණ්ඩායමයි.


සිරිසේන ජනාධිපතිවරයා ඔක්තොබර් 26 දා හවස තමාගේම මාපිටිගම බුද්ධරක්ඛිත හා විමලා විජයවර්ධන ව කිට්ටු කරගෙන ඇත. ඔවුන්ට තල්දූවේ සෝමාරාම කෙනෙකු සොයාගැනීම කිසිසේත් අපහසු නොවෙන බව අපටත් වඩා සිරිසේන ජනාධිපතිවරයා දනී.


 - අසේල සිරිවර්ධන විසිනි -

0 comments: