Hot!

තාරික් රාමදාන් නිර්දෝශී වේවිද ?

ඉස්ලාමීය විද්වතකු වන තාරික් රාමදාන් හට කාන්තාවන් පස් දෙනෙකු විසින් ලිංගික අපයෝජනා චෝදනා එල්ල කර ඇති අතර මාස 7 ක් පුරා අත්අඩංගුවේ පසුවූ ඔහු ඊයේ (18) දිනයේදී ප්‍රංශ උසාවිය හමුවේ පෙනී සිටීමෙන් අනතුරුව ඇප මත මුදාහැරියේය. සිය රෝගී තත්ත්වයත් සමග අවශ්‍ය ප්‍රතිකාර සිර මැදිරියේ සිට කළ නොහැකි බව මෙහිදී ඔහු පවසා ඇත. 


ආබාධිත කාන්තාවක් ඊයේ දිනයේදී ඔහුට එරෙහිව චෝදනා ගොනුකර තිබුණු අතර එහිදී ඇය පවසන්නේ 2009 වසරේදී ප්‍රංශයේ ලියොන් නගරයේදී රාමදාන් ඇයට පහරදුන් බවයි. අදාළ කාන්තාවගේ නම මෙතෙක් හෙළිකර නැති අතර මාධ්‍ය මගින් ඇයව ‘ක්‍රිස්ටෙලා‘ නමින් හදුන්වනු ලබයි.


රාමදාන්ට එල්ල වන චෝදනා ගැන පවසන අදාළ කාන්තාවගේ පාර්ශ්වයේ නීතිඥවරයා වන එරික් මොරේන් පවසන්නේ, ‘‘මේක අතිශය කටුක අභියෝගයක්. හැමකෙනෙක්ම තමන්ගේ තනතුරු ආරක්ෂා කරන්න උත්සහ ගන්නවා. රාමදාන් කුමන්ත්‍රණ න්‍යාය ගැන කතාබහ කරන කෙනෙක්. රාමදාන්ගේ මුහුණ කෙලින් බලලා තමන් රාමදාන්ගේ හතුරෙකු නොව ගොදුරක් බව පවසන්නට මගේ සේවාදායකයාට හැකිවේවි. ඇය වසර 10 ක් තිස්සේ මේ වේදනාව විඳිනවා‘‘ යන්නයි.


කෙසේවුවත්, රාමදාන්ගේ පාර්ශ්වයෙන් ඉදිරිපත් වන නීතිඥවරයා වන එම්මානුවෙල් මාසිග්නි පවසන්නේ, ‘ඔහු කිසිදිනක මේ කාන්තාව සමග ලිංගිකව හැසිරී නැහැ‘ යන්නයි.


තාරික් රාමදාන් යනු කවුද


රූපවාහිනී  විචාරකයෙකු මෙන්ම ඔක්ස්ෆර්ඩ් සරසවියේ මහාචාර්යවරයෙකු ලෙස ද කටයුතු කළ රාමදාන් හට පසුගිය වසරේදී "Me Too" ව්‍යාපාරය හරහා ලිංගික අපයෝජන චෝදනා එල්ලවීමත් ඔහු සිදුකළ කාර්යයන් වලින් ඉල්ලා අස්වීමට සිදුවුණි.  මේ වනවිට 56 හැවිරිදි වියේ පසුවන ඔහු ස්විට්සර්ලන්ත පුරවැසියෙකු වේ.  ඊජිප්තුවේ මුස්ලිම් සහෝදරත්වය ව්‍යාපාරයේ ආරම්භකයා රාමදාන්ගේ සීයා ය. රාමදාන් හට පළමුවරට පසුගිය පෙරවාරියේ දී දඬුවම් හිමිවූ අතර ඔහුට එහිදී එල්ල වූ ප්‍රධාන චෝදනාව වූයේ 2009 - 2012 අතර කාලසීමාවේදී කාන්තාවන් දෙදෙනෙකුට අතවර කිරීමය. ප්‍රංශයේ ජීවත් වන මුස්ලිම් කාන්තාවක් 2013 - 2014 කාලසීමාවේදී නව වාරයක් අතවරයට ලක්කිරීම මෑතකාලීනව හෙළිදරව් විය.


 



The News Arab, BBC  හා Channel News Asia ඇසුරිනි 

0 comments: