Hot!

මෛත්‍රී සමඟ එකඟතාවයක් නෑ, තිබෙන්නේ බලාපොරොත්තුවක් -TNA

අද (30)පෙරවරුවේ දෙමළ ජාතික සන්ධානය කොළඹදී මාධ්‍ය හමුවක් සංවිධානය කරමින් තම සන්ධානයට අයත් සියලූ පක්ෂ පොදු අපේක්ෂක මෛත්‍රීපාල සිරිසේන මහතාට සහය දැක්වීමට තීරණය කළ බව පැවැසීය.

එහිදී අදහස් දැක්වූ දෙමළ ජාතික සන්ධානයේ නායක ආර්. සම්බන්ධන් පැවසුවේ තම කණ්ඩායම මෛත්‍රීපාල සිරිසේන මැතිතුමා සමඟ කිසිදු එකඟතාවයකට පැමිණ නැති බවත් රට තුල ප්‍රජාතන්ත්‍රවාදය ඇති කිරීමේ හැකියාව ඔහුට ඇතැයි බලාපොරොත්තුවෙන් පමණක් ඔහුට සහාය දැක්වීමට තීරණය කළ බවයි.

එසේම මහින්ද රාජපක්ෂ පාලන කාලය තුල ඔහු ජාතික ගැටළුව ඇතුළු කිසිඳු ප්‍රශ්නයකට විසඳුම් නොදුන් බවත් ප්‍රජාතන්ත්‍රවාදය, යහපාලනය, නීතියේ ආධිපත්‍ය වෙන කිසිමදාකටත් වඩා බිඳ වැටී ඇති බවත් පැවැසීය. පසුගිය කාලය තුල ඇතිවූ ගැටළු යලිත් ඇති නොවීමේ අරමුණින් මෛත්‍රීපාල සිරිසේන මහතාට එම අවස්ථාව ලබාදීමට තීරණය කළ බව ආර් සම්බන්ධන් මහතා අවධාරණය කළේය.

උතුරු නැගෙනහිර දෙමළ ජනතාවට පසුගිය කාලයේ පැවති පළාත් සභා මැතිවරණයට වඩා වැඩි උනන්දුවකින් මෙවර තම ඡන්දය භාවිතා කරනු ඇතැයි බලාපොරොත්තු වන බවද මෙහිදී වැඩිදුරටත් ප්‍රකාශ කෙළේය.