Hot!

නිවුන්නු දෙන්නාටම ඒ-9 යි


Vijini-lalidu“ලොවෙන් එකෙක් එක් දෙයකට වෙයි සමත” යනුවෙන් කියමනක් තිබුණද ලොවින් දෙදෙනෙක් එකම දෙයකට සමත් වීම අරුමයක් නොවේ. ඒ එකම දෙයකට සමත්කම් දක්වන බොහෝ පිරිසක් සිටින බැවිනි. නමුත් නිවුන්නු දෙදෙනෙක් සාමාන්‍ය පෙළ විභාගයට පෙනී සිට සියලු විෂයන්ට ඒ සාමර්ථ නවයක් දිනා ගැනීම නම් අපූර්ව සිද්ධියකි. මක් නිසාදයත් අප දන්නා තරමින් මෙවර සියලු විෂයන්ට ඒ නවයක් ලැබූ ශිෂ්‍ය ශිෂ්‍යාවන් පන්දහස් හත්සිය අනූවක් අතරේ මෙවැනි තවත් නිවුන් දරුවන් දෙදෙනෙකු නැති බැවිනි.
සාමාන්‍ය පෙළ විභාගයෙන් විශිෂ්ට දස්කම් දැක්වූ තම දරුවන්ගේ හපන්කම් ගැන මව්වරු පියවරු සතුටු කඳුළු හෙළන විට ගාල්ලේ, බලගොඩ පදිංචි කේ.යූ. ආනන්ද සරත්කුමාර හා කමණි හේමලතා යුවළට දෙවරක් තුටු කඳුළු වගුරන්නට සිද්ධ වූයේ මේ හපන්කම කළේ ඔවුන්ගේ දරුවන් දෙදෙනා බැවිනි.
මේ කතාවේ කතානායකයෝ විජිනි විනෝද්‍යා හා ලලිඳු චුලංගය.
 ඔවුන් දෙන්නා මෙලොව එළිය දුටුවේ එක්දහස් නමසිය අනුහතේ දෙසැම්බර් දහ වැනිදාය. ඒ රාගම ශික්ෂණ රෝහ‍ලේදීය. මුලින්ම උපත ලැබුවේ විජිනිය. ඒ සවස තුනයි එකටය. ඇය ඉපදී විනාඩි අටක් ගිය පසු එනම් තුනයි නවයට ලලිඳු උපත ලැබිය.
නිවුන් දරුවන් දෙන්නා ඉපදෙන කාලයේ කමණි පුහුණු හෙදියක ලෙස සේවය කරමින් හුන්නාය. ඇයට උපදින්නේ නිවුන් දරුවන් බව මුලින්ම අනාවැකි කීවේ ඇගේ සොහොයුරියක වන මේකලාය. එකල ඇය වෛද්‍ය ශිෂ්‍යාවකි. දරුගැබට තුන් මසක් පිරෙන කල මේකලා සිය සොයුරිය කැටුව ප්‍රසව හා නාරිවේද විශේෂඥ වෙද්‍යවරයෙකු ළඟට රැගෙන ගියේ මේ කාරණාව ගැන සැක හැර ගන්නය. “නිවුන්නු තමයි ඔයාට ඉන්නේ” වෛද්‍යවරයා එසේ කියද්දී කමණිගේ හිත සතුටින් පිරී ගියේය. වෛද්‍යවරයා තවත් අනාවැකියක් කියමින් පැවසුවේ එසේ දරු ගැබේ සිටින්නේ පිරිමි  දරුවෙකු හා ගැහැනු දරුවෙකු බවය. දරුගැබට කලක් ගත වන විට නිසැකව සිටින්නේ පිරිමි දරුවෙකු හා ගැහැනු දරුවකු බව  වෛද්‍යවරයා කීවේය. කමණි දස මාසයක් කුසේ හොවාගෙන සිටි නිවුන්නු දෙන්නා බිහි කළේ සාමාන්‍ය පරිදිය.
“මුල් දවස්වල එකවර දෙන්නම බලාගන්න ටිකක් අමාරු වුණා. දුව මව්කිරි බිව්වේ මාස තුනයි. ඊට පස්සේ දුන්නේ පිටි කිරි. ඒත් පුතානම් අවුරුදු එකහමාරක් මව්කිරි බිවා. දරුවන් දෙන්නත් එක්ක රාගම ඉන්නවාට වඩා ගාලු යන එක ‍ලේසි නිසා අපි ගාල්ලේ පදිංචියට ආවා” කමණී එසේ කියන්නීය.
Vijini-lalidu1දරුවන් උපත ලැබූ පසු සිය වෘත්තියටද ආයුබෝවන් කී කමණී ගාලු ආවාය. ඔවුන් තිදෙනා ‍පෝෂණය කළේ ආනන්දගේ ව්‍යාපාරික කටයුතුවලින් ලැබෙන මුදලිනි.
අන් නිවුන් දරුවන් මෙන් කමණිගේ දරුවන් දෙන්නාට ඇන්දුවේ එකම ඇඳුම්ය. කෑවේ බිවේ එකටය. ගමන් ගියෙත් එකටය. මව් තුරුල්‍ලේ නිදා ගන්නෙත් එකටය. සැබැවින්ම ඔවුහු සිරුරෙන් වෙන්වී සිටියද මනසින් එකට ජීවත් වූ දරුවෝ වූහ.
විජිනිත්, ලලිඳුත් පෙර පාසල් යාමෙන් පසු ආනන්දත් කමණිත් වෙහෙසුණේ දරු දෙන්නට එකට ඉගෙන ගතහැකි හොඳ පාසලක් සෙවීමටය.
මන්දයත් ඔවුන් දෙදෙනා නිතරම එකට වැඩකටයුතු කිරීමට පුරුදු වී සිටි බැවිනි. පාස‍ලේදී වෙන් වෙන් වශයෙන් දෙතැනකට වැටුණහොත් මොවුන් දෙදෙනාගේ මානසික තත්ත්වයට දැඩි බලපෑමක් වේ යැයි ආනන්ද හා කමණි කල්පනා කළහ.
ඒ අනුව ඔවුන් ගාල්ලේ ඇති මිශ්‍ර ජාතික පාසල් අතර ප්‍රධාන තැනක් උසුලන ලබුදූව සිරිධම්ම විද්‍යාලයට දරුවන් දෙදෙනා ඇතුළු කළහ. ඔවුන් දෙන්නා පාසලට ඇතුළු කළ දවසේ ආනන්දත්, කමණිත් විදුහල්පතිවරයාගෙන් හා ප්‍රාථමික අංශ භාර විදුහල්පතිනියගෙන් කාරුණික ඉල්ලීමක් කළහ. ඒ දරු දෙන්නා පන්තියේ එකම ස්ථානයක තබන ලෙසය. ඒ අනුව ලලිඳු හා විජිනි සිරිධම්ම විද්‍යාලයේ පළමු ශ්‍රේණියේ සිට 5 වසර දක්වා එකම පන්තියේ එකම මේසයේ අධ්‍යාපනය ලැබුවේ එකටය. පහ වසර ශිෂ්‍යත්ව විභාගය සඳහාද ඔවුන් දෙන්නා අමතර පන්ති ගියේද එකටය. කමණිගේ පියා වූ විශ්‍රාමික ගුරුවරයෙකු වන නන්දදාස පතිරණවසම් සිය මුණුබුරාටත්, මිණිබිරියටත් හැම විටම උපකාර කළේය.
ශිෂ්‍යත්ව විභාගයෙන් මේ දෙදෙනාම සමත් වන්නේ තම අධ්‍යාපන ජීවිතයේ පළමු කඩඉම පහසුවෙන්ම පසු කරමිනි. එහිදී විජිනි ලකුණු 170ක් ලබා ගත් අතර ලලිඳු ලබාගත්තේ ලකුණු 168කි. ශිෂ්‍යත්ව විභාගය සමත් වීමෙන් පසු විජිනි ගාල්ල සංඝමිත්තා විද්‍යාලයටද, ලලිඳු ගාල්ල මහින්ද විද්‍යාලයටද ගියහ. 
පාසල් දෙකක අධ්‍යාපනය ලැබිම නිසා ඔවුන් දෙන්නා පාසල් වේලාවේ වෙන්වී හුන්නද පාසල් ගොස් ගෙදර පැමිණ පාස‍ලේ අධ්‍යාපන කටයුතු කළේ එකටය.සිරිධම්ම විද්‍යාලයේ පළමු ශ්‍රේණියේ සිට 5 ශ්‍රේණි දක්වා  විජිනි පන්තියේ පළමු වෙනියා වූ අතර ලලිඳු දෙක තුන යන ස්ථාන ලබාගත්තේ සිය සොයුරියට දෙවැනි වෙමිනි.
“මේ දරු දෙන්නා කුඩා කාලයේ ඉඳන්ම බෝනික්කන්ට හරි ආසයි. දෙදෙනාම හරි සමගියි. පුංචි කා‍ලේ ඉඳන්ම එදා වැඩ එදාම කළා. පාන්දර නැගිටලා පාඩම් කළා” යැයි කමණි පවසන්නීය.
ෙදෙනික අධ්‍යාපන කටයුතුවලට අමතරව මොවුන් දෙදෙනා මහින්ද හා සංඝමිත්තා යන විදුහල්වලදී පිහිනුම්, නාට්‍ය, ඉංග්‍රීසි, සාහිත්‍ය දින වැනි ක්‍රියාකාරකම්වල යෙදෙමින් දක්ෂතා දැක්වූහ.
අද පාසල් අධ්‍යාපනයට අමතරව එම අධ්‍යාපනික විෂයන් නැවත නැවත ඉගෙනීමට උපකාරක පංති සොයා දෙමාපියන් දරුවන් ගෙනියන තරගකාරී, අසහනකාරී අධ්‍යාපන රටාවෙන් හෙම්බත් කරන්නට ආනන්ද හා කමණී තම දරුවන් යෙදෙව්වේ නැත. එම දරුවන්ට අත්‍යවශ්‍ය යැයි හැඟෙන අමතර ඉංග්‍රීසි දැනුම ලබා ගැනීමට පමණක් කුඩා කල සිටම ගාල්ලේ උළුවිටිකේ “බ්‍රයිට් වේ” ආයතනයේ අධ්‍යක්ෂ හා ඉංග්‍රිසි ආචාර්ය කමල් සහබන්දු ගුරුතුමා ළඟට යැවීය. මේ අපූරු නිවුන්නු දෙන්නාගේ වැඩිමලා වන විජිනි විනෝද්‍යා සොයුරු පෙම ගැන මෙසේ කීවාය. “මල්ලි තමයි මගේ හොඳම යාළුවා. මල්ලිගේ හොඳම යාළුවා මම”.
“මල්ලි නම් ගොඩක් පාඩම් කරනවා. ඒ වගේ එයා සොයා ගන්න, ලබා ගන්නා දැනුම මට බෙදා දෙනවා. අපි දෙදෙනා පාඩම් කළේ එකට. පාස් පේපර් ගොඩක් කළා. මම රෑ වෙනකම් ටිකක් පාඩම් කරනවා. මල්ලි උදේ 3 විතර ඉඳන් පාඩම් කරනවා. මම 5ට විතර තමයි පාඩම් කරන්න පටන් ගත්තේ.
මම සංඝමිත්තා විද්‍යාලයට ගියාට පස්සේ පංතියේ මුල් පස්දෙනා අතර ස්ථාන දිනා ගත්තා. වාර විභාගවලදී. දහම් පාසල් ගියා. මමත් මල්ලිත් අමතර විෂයන් විදියට සාමාන්‍ය පෙළට ඉංග්‍රීසි සාහිත්‍ය, වාණිජ හා තොරතුරු   තාක්ෂණය තමයි කළේ”. ඇය කියන්නීය.
සොයුරිය මෙන් ලලිඳුද අකුරු කළේ උනන්දුවෙනි. මහින්ද විද්‍යාලයේ වාර විභාගවලදී මුල් ස්ථාන කිහිපයක් හිමිකර ගැනීමට ඔහුට හැකි වූයේ එබැවිනි.
ගිය අවුරුද්දේ දෙසැම්බරයේ පැවති අ.‍පො.ස. සාමාන්‍ය පෙළ විභාගයේ එදිනෙදා පැවති විෂයන් සඳහා පෙනී සිටි මේ නිවුන්නු හවසට ගෙදර පැමිණි විගසම මවට දුන්නේ එකම පිළිතුරකි. “අද පේපර් එකට ලකුණු අනූවක් ලැබේවි” මේ අතරේ විභාගය අවසන් වී දෙතුන් මසක් යන විට රූපවාහිනියේ දහව‍ලේ ප්‍රවෘත්ති විකාශයේදී කියවුයේ විභාග ප්‍රතිඵල නිකුත් වී ඇති බවය. ඒ ආරංචිය ලැබි විනාඩි දහයක් යන විට කුරුණෑගල සේවය කරන ලලිඳුගෙත් විජිනිගෙත් පුංචි අම්මා වූ වෛද්‍ය මේකලා පතිරණවසම් ඔවුන් ඇමතුවාය. අන්තර් ජාලයෙන් විභාග ප්‍රතිඵල සෙවූ ඇය අක්කාත් මල්ලීත් ගත් “ඒ” සාමාර්ථ එකින් එක කියන විට කමණිගේ හදවත ගැහුණි. දෙන්නාම සියලු  විෂයන්ට ඒ සාමාර්ථය දිනා ගත් බව සිය සොයුරිය කියූ සැණින් ඇය දරු දෙන්නා වැළඳගෙන තුටු කඳුළු වැගුරුවාය. 
“මේ දෙදෙනාම ඒ 9ක් ගත්ත එක අපිට විශාල සතුටක්. මේ දෙදෙනාම ඉගෙන ගන්න හරි උනන්දුයි. අපි උදේට පාඩම් කරන්න නැගිට්ටවන්න ඕනේ නැහැ. එයාලම නැගිටලා පාඩම් කරනවා. සමහර වෙලාවට අපිට නැගිටින්නත් කලින් එයාලා පාඩම් වැඩ. පුතා ඉගෙන ගන්න හරිම උනන්දුයි. එයා ගොඩක් මහන්සි වෙනවා. දුව සාමාන්‍ය පරිදි තමයි වැඩකරන්නේ. දැන් මෙයාලගේ තාත්තා කොයිතරම් කාර්යබහුල වුණත් දරුවන් ගැන සොයා බලලා නිතර ඇවිත් දරුවන් හා මාව උනන්දු කරනවා. මේ ජයග්‍රහණය පිළිබඳව ගොඩක් සතුටුයි” කමණී එසේ කියන්නීය. 
ලලිඳු චුලංගගේ බලා‍පොරොත්තුව වන්නේ වෛද්‍යවරයෙක් වීමයි. තමාට මේ ජයග්‍රහණය ගැනීමේදී කමල් සහබන්දු ගුරුතුමා, කෝලිත ඩී. සිල්වා ගුරුතුමා සහ අනෙක් ගුරුභවතුන් මහින්ද විද්‍යාලයේ විදුහල්පතිතුමා වන වසන්ත සිරිවර්ධන ගුරු පියවරුන්ද සිහිපත් කළ යුතුයැයි ලලිඳු චුලංග කියන්නේය.
මල්ලි අනාගතයේදී වෛද්‍යවරයෙක් වීමට බලා‍පොරොත්තු වෙද්දී අක්කාගේ බලා‍පොරොත්තුව කුමක්දැයි අපි විජිනිගෙන් ඇසුවෙමු. මල්ලි වගේ මමත් වෛද්‍යවරියක් වීමට බලා‍පොරොත්තු වෙනවා ඇය කියන්නීය.
ජිනේෂ් නානායක්කාර
Lakbima