Hot!

චන්ද්‍රිකාගේ හතරවරං

 | උපුල් ජෝශප් ප්‍රනාන්දු

"චන්ද්‍රිකා ඇයි හිටි හැටියේම රනිල්ව හමුවෙන්න ගියේ...?"
"ආගමික සංහිඳියාව ඇති කරන්නනේ..."

"මෙච්චර කල් ඉඳල හිටි හැටියේම ආගමික සංහිඳියාව ඇති කරන්න රනිල් හමුවුණේ ඇයි...?

"අනික ඡන්දයක් කට ළඟ තියෙද්දී..."

"බණ්ඩාරනායකලාට බේස් එක තියෙන ගම්පහ ඡන්දයත් තියෙන වෙලාවේම යන්නේ...?"

මේ චන්ද්‍රිකා රනිල් හමුව ගැන මිනිස්සු කියන කතාය.

මේ වගේම මංගල සහ ශ්‍රී පති 2007දී 'සිහිනයේ අභියෝගය' නමැති රට හදන ප්‍රතිපත්ති ප්‍රකාශනය අරගෙන රනිල් හමුවෙන්න රනිල්ගේ කාර්යාලයට ගියහ. වැඩි දවසක් ගියේ නැත. රනිල් - මංගල සහ ශ්‍රී පති එකට එක්වී 2008 අය - වැයෙන් ආණ්ඩුව වට්ටන්න සාකච්ඡා ආරම්භ කළහ.

"රනිල් - චන්ද්‍රිකා හමුවෙන් පස්සෙත් ඒකම වෙයිද...?"

කියන්න දන්නේ නැත.

'දේශපාලනය ගැන කිසිම දෙයක් කතා කළේ නැහැ...'

චන්ද්‍රිකා එළියට ඇවිත් මාධ්‍යයන්ට කීවාය.

"මම ආගමික සංහිඳියාව ගැන සාකච්ඡා කරන්න ජනාධිපතිගෙනුයි ඇමැතිවරුන්ගෙනුයි අවස්ථාව ඉල්ලල තියෙනවා. තවම ප්‍රතිචාර නැහැ..."

චන්ද්‍රිකා කියා තිබුණි.

ආගමික සංහිඳියාව කියන මාතෘකාව ලංකාවේ සමාජ, දේශපාලන, සංස්කෘතික බලවේග එක තැනකට ගෙන එන්න හොඳ මාතෘකාවකි. රනිල්ව හමුවීමටත් කලින් චන්ද්‍රිකා මහානායක හිමිවරුන් හමුවී මේ ගැන සාකච්ඡා කළ බව ඇය මාධ්‍යයන්ට කියා තිබිණි. ඊළඟට ඇයට කතෝලික, ක්‍රිස්තියානි, හින්දු සහ මුස්ලිම් ආගමික නායකයන් හමුවී මේ ගැන සාකච්ඡා කරන්න පුළුවන. විපක්‍ෂයේ මෙන්ම ආණ්ඩුවේ පක්‍ෂ ශ්‍රී ල.නි.ප.යේම මැති ඇමැතිවරුන් හමුවී ඇයට මේ ගැන සාකච්ඡා කරන්න පුළුවන. ඒ වගේම නීතිඥ, වෛද්‍ය ඇතුළු විද්වත් සංවිධාන පමණක් නොව මාධ්‍ය පවා හමු වී සාකච්ඡා කරන්න මෙය හොඳ මාතෘකාවකි.

ආගමික සංහිඳියාව යන මාතෘකාව යටතේ චන්ද්‍රිකා සතියෙන් සතිය මාධ්‍යයන්ට නිවුස් හදන කොට බිත්තර තම්බන ගාණට රත් වෙන්නේ මහින්දගේ පපුවය. චන්ද්‍රිකාගේ මේ හමුවීම් නතර කරන්න මහින්දට බැරිය. ඇය ආගමික සංහිඳියාව ගැන සාකච්ඡා කරන්න අවස්ථාවක් ඉල්ලපුවාම මහින්ද කල්යල් බලන්නේ සංහිඳියාවට මුවාවෙලා ආණ්ඩුවේ ඇමැතිවරු හිඳින්න චන්ද්‍රිකා හැටහතර මායම් දානවාද කියා හිතල විය යුතුය. මහින්ද චන්ද්‍රිකා හමු වූ විට මේ වැඩේට රාජ්‍ය පිළිගැනීමක් ලැබේ. ඉන්පසු චන්ද්‍රිකා ඇමැතිවරුන් හමු වන විට එය නතර කරන්න මහින්දට බැරිය. චන්ද්‍රිකා එක්ක කතා කරන ඇමැතිවරුන් ගැන මහින්ද ඉන්නේ ඇහැ ගහගෙනය. මේ නිසාම ඇමැතිවරුන් චන්ද්‍රිකා එක්ක කතා කරන්න පණ බයය. ඒත් මේ වගේ වැඩක් අස්සේ ඇමැතිවරුන්ට චන්ද්‍රිකා හමුවී නිවී සැනසිල්ලේ කතා කරන්න පුළුවන.

සඟ, වෙද, ගුරු, ගොවි, කම්කරු යන පංච මහා බලය පමණක් නොව රටේ විවිධ බල කණ්ඩායම් හමු වී සාකච්ඡා කොට චන්ද්‍රිකා ඉදිරිපත් කරන යෝජනාවලිය රටේම කතාබහට ලක් වෙන යෝජනාවලියක් විය හැකිය.

'පොදු අපේක්ෂකයා එන්නේ ඒ යෝජනාවලිය තුළින්ද...?'

ඒක නම් තවම කියන්න බැරිය. හැබැයි චන්ද්‍රිකා මේ වැඩේට බැහැල තියෙන්නේ නිකම්ම නිකන් කාලයක නොවේ. ඇය යූ.ඇන්.පී.යේ 17ත් වසරක ආණ්ඩුව වෙනස් කොට හරියටම වසර 20ක් පිරෙද්දීය.

1994 හරියටම මේ වගේ මාර්තු මාසයකදී චන්ද්‍රිකා හිටියේ දකුණේය. ඇය දකුණේ ගම් නියම්ගම් පුරා යමින් මහ රෑ එළිවෙන ජාමෙටත් රැස්වීම් තියමින් වසර 17කට පසු යළි ශ්‍රී ල.නි.ප. ආණ්ඩුවක් බලයට ගෙන එන්න දරදිය ඇද්දාය. චන්ද්‍රිකා රැල්ල කියල රැල්ලක් හැදුණේ ඒ කාලයේය. යූ.ඇන්.පී. ය හාන්සි වුණේ ඒ රැල්ලෙන්ය. චන්ද්‍රිකා දකුණට ගිහින් කීවේ යූ.ඇන්.පී. ආණ්ඩුවේ අවසානයක ආරම්භය සහතික කරල දෙන්න කියලාය. දකුණේ ජනතාව ඒ වැඩේ කරල දුන්නේය. දකුණ දිනලා චන්ද්‍රිකා රටම දින්නේ 1994 ජූලි මහ මැතිවරණයෙන්ය.

ඒ මෙයට හරියටම වසර 20කට කලින්ය. මෙයට හරියටම වසර 10කට කලින් චන්ද්‍රිකා 2001දී තමාට අහිමි වුණ ආණ්ඩුව යළි ලබා ගත්තාය. ඒත් හරියටම 2004 පෙබරවාරි මාසයේ පාර්ලිමේන්තුව විසුරුවල අප්‍රේල් ඡන්දය තියලාය. ඇය යළි තමාට ආණ්ඩු බලය දෙන්න යැයි කියමින් රට වටා ගියේ හරියටම මේ වගේ 2004 මාර්තු මාසයේය. හැබැයි තමා බලය ඉල්ලන්නේ තමාට හිමි ශ්‍රී .ල.නි.ප. නායකත්වයත් නැති කරගෙන මහින්දව ජනාධිපති කරන ආණ්ඩුවක් පිහිටුවන්න යැයි චන්ද්‍රිකා එදා හීනෙන්වත් නොහිතන්න ඇත.

ඇත්තටම 2004 පාර්ලිමේන්තුව විසුරුවාලීම වළක්වා චන්ද්‍රිකා සහ එවකට අගමැති රනිල් අතර සංහිඳියාවක් ඇති කොට ජාතික ආණ්ඩුවක් පිහිටුවන්න චන්ද්‍රිකාගේ විශ්වාසවන්තයා වූ මනෝ තිත්තවැල්ල සහ රනිල්ගේ විශ්වාසවන්ත මලික් සමරවික්‍රම අතර සාකච්ඡා ආරම්භ විය. එම සාකච්ඡාවලට ඉන්දියාව, ඇමෙරිකාව ඇතුළු බටහිර රටවල් සහාය පළ කළහ. සාකච්ඡා පටන් ගන්නකොට චන්ද්‍රිකා රනිල්ගේ ආණ්ඩුවේ අමාත්‍යංශ තුනක්ම අරගෙන තිබුණි. රාජ්‍ය ආරක්‍ෂක, පොලිස් සහ මාධ්‍ය එම අමාත්‍යංශ තුනය.

"මම ජේ.වී.පී. එක්ක ගිවිසුම් ගහනවාට වඩා මේ ජනවාර්ගික ප්‍රශ්නය විසඳන්න යූ.ඇන්.පී. එක්ක ගිවිසුමකට එන්න කැමැතියි. ඔයා රනිල්ට ගිහින් කියන්න මම ගත්ත අමාත්‍යංශ තුනම එක පාර දෙන්න බෑ. එතකොට මම විහිළුවක් වෙනවා. පොලිසිය භාර අමාත්‍යංශයයි, මාධ්‍ය එකයි මම දෙන්නම්. මම රනිල් එක්ක එකතු වෙලා සාම වැඩපිළිවෙළ ගැන එකඟතාවකට ආවාට පස්සේ ආරක්‍ෂක අමාත්‍යංශය දෙන්නම්. එතෙක් රනිල් එක්ක සාකච්ඡා කරල ආරක්‍ෂක අමාත්‍යංශයේ වැඩ කරගෙන යමු..."

මේ චන්ද්‍රිකා මලික්ට කී කතාවය. ඒත් රනිල් කීවේ පළමුව චන්ද්‍රිකා කරපු වැරැද්ද නිවැරැදි කරන්න ඕනෑ කියාය. සාකච්ඡා දිග්ගැස්සෙද්දී මංගලලා, කදිරගාමර්ලා සහ ජ.වි.පෙ. පාර්ලිමේන්තුව විසුරුවන ලෙස චන්ද්‍රිකාට බලපෑම් කළහ. චන්ද්‍රිකා ඔවුන්ගේ හඬට යට විය. එදා චන්ද්‍රිකා සහ රනිල් අතර සංහිඳියාව ඇති වුණා නම් අද මහින්ද මේ රටේ ජනාධිපති නොවේ. එහෙනම් මහින්දට අගමැතිකමවත් නැත. එහෙම වුණා නම් මහින්ද අදටත් විපක්‍ෂ නායකය.

එදා චන්ද්‍රිකා - රනිල් සංහිඳියාවට එරෙහි වූ මංගලලාත් ඒ කරපු ඓතිහාසික වරද ගැන කනගාටුව පළ කර ඇත. ජ.වි.පෙ. දෙකඩ වුණෙත් ඒ ඓතිහාසික වැරැද්ද නිසාය. ඒ වැරැද්ද නොකළා නම් අද ශ්‍රී .ල.නි.ප. - ජ.වි.පෙ. සන්ධාන විපක්‍ෂයේ විපක්‍ෂ නායකයා ජ.වි.පෙ.න්. බිහි වීමට ඉඩ තිබුණි. මහින්දට එහෙම නම් විපක්‍ෂ නායකකමත් නැත.

'ආගමික සංහිඳියාව හරහා චන්ද්‍රිකා ඒ ඓතිහාසික වැරැද්ද නිවැරැදි කරන්න යනවාද...?'

ඒක ගැන තවම කියන්න කල් වැඩිය. හැබැයි චන්ද්‍රිකා ආ වෙලාවේ රනිල් කීවේ එජාපයට පක්ෂයක් ලෙස සංහිඳියාවට එක් වෙන්න බැරි බවය.

'නොකියා කීවේ චන්ද්‍රිකා අපේක්ෂිකාව වුණොත් යූ.එන්.පී. සහාය නැති බවද?'

ඒක දන්නේ රනිල් විතරය.

කොහොම වුණත් 1994, 2004 වගේම 2014ත් චන්ද්‍රිකාට තීරණාත්මක විය යුතුය. මොකද හතර කියන්නේ චන්ද්‍රිකා පෙරළි කරන හතර පෙරළියේ වසරය.