Hot!

සේනාගෙන් පාඩමක් උගෙන වසවිස නැති ගොවිතැන ගැන හිතමු


සමාජ ප්‍ර‍ජාතන්ත්‍ර‍වාදී පක්ෂයේ ප්‍ර‍ධාන ලේකම්, තුසිත බාලසූරිය නිවේදනයක් නිකුත් කරමින් අවධාරණය කර සිටින්නේ මේ වනවිට පවති සේනා වැනි දළඹු උවදුරු වලට පවතින එකම නිශ්චිත විසඳුම වන්නේ වසවිස නැති ගොවිතැනට විකල්ප යොදා අතිරික්තයක් දක්වා නිෂ්පාදනය වර්ධනය කිරීමේ වැඩපිළිවෙලකට යෑම බවයි.

එම නිවේදනය මගින් වැඩිදුරටත් පෙන්වා දෙන්නේ,

‘‘පසුගිය (ජනවාරි 27) රාවය පුවත්පත කෘෂි විද්‍යාඥයන් උපුටා දක්වමින් සේනා දළඹු උවදුර පිටුපස මොන්සැන්ටෝ සමාගම ඇති බවට වාර්තා කර තිබේ. සේනා නම් වු පලිබෝධ වසංගතයට ඔරොත්තු දිය හැකි එකම බීජ ප්‍රභේදය නිපදවන්නේ මොන්සැන්ටෝ සමාගම පමණක් වන නිසා මොන්සැන්ටෝ බීජ සමාගම සේනා වසංගතය පිටුපස ඇතැයි සිතීම සාධාරණ සැකයකි. රාවය පුවත්පත වැඩිදුරටත් අනාවරණය කරන්නේ සේනා දළඹුවන් විනාශ වන බැක්ටීරියාවක් කෘතීමව යොදා නිපදවන මොන්සැන්ටෝ බීජ මිනිස් පරිභෝජනයට නුසුදුසු බවයි.


සේනා දළඹුවන් තුරන් කිරීමට කිසිදු සාර්ථක විසදුමක් ඉදිරිපත් වී නොමැති නිසා මොන්සැන්ටෝ බීජ ඒකාධිකාරයට යටත් වීමට ගොවීන්ට සිදුව ඇත. ලංකාවේ අත්හදා බලා ඇති අළු යෙදීම වැනි ස්වභාවික විකල්ප විශාල වගාවකට නොගැලපෙන බව ගොවීන්ගේ අදහසයි. ඊට අමතරව දේශීය ක්‍ර‍මවලට නිපදවන පලිබෝධනාශකයන් නිෂ්පාදනයට හා ගොවිතැනට යෙදීමට වැයවන අධික පිරිවැය හේතුවෙන් මොන්සැන්ටෝ සමාගම ගොවීන්ගේ එකම ගැලවුම්කරුවා බවට පත්වී ඇත.


සේනා දළඹුවන් ව්‍යාප්තියට වසවිස නැති ගොවිතැන දිරිමත් කිරීම හේතුවක් වී ඇතැයි කෘමිනාශක සමාගම් හා එම සමාගම්වල පහස ලබන දේශපාලකයන් විසින් ඉදිරිපත් කරන තර්කයට පදනමක් නැතත් එමගින් වසවිස නැති ගොවිතැන අධෛර්්‍යමත් වනු ඇත. මුලින් දුම්කොළ වගාවට යොදන අධික සැර කෘමිනාශක යොදා සේනා මැඩිය හැකි බවට රාවයක් පැතිර ගියේය. එය ගොවීන් මුලාකිරීමක් බව ඔප්පු කරමින් සේනා වසංගතය දුම්කොළ වගාවද ආක්‍රමණය කළ අතර එහි වාසියත් කෘමිනාශක සමාගම් හිමි කර ගත්තේ ය.
තුසිත බාලසූරිය


අවසාන වශයෙන් සිදුවීමට නියමිත ලෝකය පුරාම වසවිස නැති ගොවිතැනට වින කරන අන්තර්ජාතික බීජ මාෆියාව හා පලිබෝධනාශක නිෂ්පාදන සමාගම් මාෆියාව ලංකාව ආක්‍රමණය කිරීමයි. ජාන වෙනස් කළ බීජ හා අධික විස සහිත කෘමිනාශක භාවිතයට අකමැති ගොවීන්ට තවදුරටත් පාඩු සිදුවිය හැකිය. එය ආහාර අර්බුදයක් වීමේ අවධානමක්ද පවතී. ඊට අපගේ විසඳුම වසවිස නැති ගොවිතැනට විකල්ප යොදා අතිරික්තයක් දක්වා නිෂ්පාදනය වර්ධනය කිරීම යි.‘‘ යන්නයි.

0 comments: