Hot!

මායිම් ගම්මානයේ සෙබළාගේ කතාව









වීරත්වය බිහිවන්නේ මිනිසුන් නැසීමෙන් නොව රැකීමෙනි


යුද්ධ වීරයන් ගැන නන්දෙසින් කතා කරනු ලබයි. වීරයන් බව සැබෑය. වීරත්වය බිහිවනුයේ මිනිසුන් නැසීම නිසා නොව මිනිසුන්ගේ ජීවිත බේරාගත් නිසාය. ජිවිතයක් රැකගැනීමට තම ජීවිතය අනතුරේ හෙළා ගන්නා පුද්ගලයා වීරයෙකි. ඒ ඔහු තුළ ඇති පරාර්ථකාමී සිතුවිලි නිසාවෙනි. යුද්ධය එබඳු වීරයන් දකුණේ ද උතුරේ ද බිහි කර ඇත. දේශද්‍රෝහීන් ද දේශප්‍රේමීන් ද ඇත. දේශයට තමා උපන් රටට සංස්කෘතියට ආදරය ගෞරව කරමින් එය අභිමානයෙන් යුතුව සිතන ක්‍රියාකරන පිරිස මෙම කොටසට අයත් වෙයි. දේශද්‍රෝහීන් යනු තම පටු අරමුණු සඵල කර ගැනිම සදහා ජාතිය රට සංස්කෘතිය භාවිතා කරන්නන්ටය.


මානව හිතවාදීන් ඇත. ඔවුන් ජාති ආගම් භේද පසෙකලා සියලු දෙනාම මිනිසුන් ලෙස සලකා මනුෂ්‍යත්වයෙන් සියලු දෙනා දෙස බලන පිරිසකි. ජීවහිතවාදීන් මනුෂයන් පමණක් නොව ගහකොළ සතා සිව්පාවා පවා මේ පරිසර පද්තිධයේම කොටසක් ලෙස හඳුනාගෙන කටයුතු කරන අතර එම අදහස වෙනුවෙන් පෙනී සිටියි. එක් එක් අයගේ ද්‍රෘෂ්ටිකෝණයෙන් අනුව මොවුන් වීරයන් ද ද්‍රෝහීන් ද වෙයි.








මායිම් ගම්මානයේ යුද සෙබළා දකුණේ යුද සෙබළාට වඩා වෙනස්ද ?


මායිම් ගම්මානයේ යුද සෙබළෙකුගේ කතාව දකුණේ යුද සෙබළුන්ගේ කතාවට වඩා වෙනස් ය. මායිම් ගම්මාන යනු උතුරු මැද හා නැගෙනහිර දෙමළ ජනතාව බහුතරයක් වූ ප්‍රදේශවල පිහිටි සිංහල ගම්මානයන් ය. උතුරේ දෙමළ ජනතාව යුද්ධයට සෘජුව මැදිහත් වුණා සේම මායිම් ගම්මාන වල ජනතාව ද යුද්ධයේ සම්පූර්ණ කොටස් කරුවෝය. මෙම ගම්මානවල මිනිසුන් බොහොමයක් යුදමය පසුබිම සහිත කාලයේ ජීවත් වූයේ අනාථ කදවුරුවල ය. තවත් කොටසක් ගම්මානවල ජීවත් වූ අතර ජිවිතය පිළිබඳ සුරක්ෂිතභාවය ඉතාම පහළ අගයක් ගනු ලැබීය. රාත්‍රිය කැලෑවේ ගත කරන ඔවුන් දිවා කාලයේ ගමට පැමිණෙයි. රාත්‍රිකාලයේ දූ දරුවන් සමග කැළයේ ගත කිරීම සුලුපටු කාර්යයක් නොවේ. රාත්‍රීකාලයේ සතුරන්ගෙන් බේරීමට කැළෑවට යන මොවුන් සතුන්ගේ ගොදුරු වූ අවස්ථා නැතුවා නොවේ. එසේම උදයේ කැළයෙන් එලියට එනවිට කුඩා ළමයින්ට කූඹි හා වෙනත් කෘමි සතුන්ගෙන් සිදුවූ හානි නිසා රෝහල් ගත වීමට සිදුවන අවස්ථා ද බොහෝමයකි. සෞඛ්‍ය, ජීවිත සුරක්ෂිතභාවය පිලිබඳ අවම හැඟීම් සහිතව ජීවත් වීම මහත් මානසික කනස්සල්ලකි.


උතුරේ ජීවත් වන දෙමළ මිනිසුන් ද මීට දෙවැනි නොවන ජීවිත ගත කරනු ලැබීය. කොයියම් මොහොතක ගුවන් ප්‍රහාරයක්, දෙපිරිස අතර ගැටිමක් සිදුවේ දෝ යන බිය සහිතව ඕනෑම වේලාවක උත්සන්න විය හැකි යුද්ධය නිසා තමා උපයා ගත් සියල්ල මොහොතකින් අමතක කර ජීවිත ආරක්ෂාව පතා දුවන්නට සිදුවන බව දැන ගෙන අතහැරීම පිළිබඳ සිතිවිල්ලකින්ම මොවුන්ට ජීවත් වන්නට සිදු වී ඇත. තමන්ගේ දූදරුවන් හමුදාවට එරෙහිව සටන් පෙරමුණුවල සිටින නිසා තම දූදරුවන්ගේ ජීවිත පිළිබඳ කිසිදු සෙවිල්ලක් කිරීමට උතුරේ මව් පියවරුන්ට නොහැකිය.





මායිම් ගම්මාන වල සෙබළා ද උතුරේ හමුදාව සමග සටන් වදින කොටි සාමාජිකයා භුක්තිවිඳින අත්දැකීමම විඳියි



මායිම් ගම්මානවල සෙබළා ද උතුරේ හමුදාවට එරෙහිව සටන්වදින කොටි සාමාජිකයා භුක්ති විඳින අත්දැකීමම විඳිනු ලබයි. කොටි සාමාජිකයින්ගේ දෙමාපියන් ද අනාථ කඳවුරුවල ය. මායිම් ගම්මානවල සෙබළාගේ දෙමාපියන් ඥාතීන් ද කඳවුරුවල ය. බොහෝවිට කොටි සාමාජිකයින්ට ද ස්ථිර ගෙවල් දොරවල් නොමැත. මායිම් ගම්මානයේ සෙබළාට ද ගෙවල් දොරවල් නැත. හමුදා සේවයේ සිටින විට කැළෑවල කඳවුරුවල ගත කරන ඔහු ගමට ආපසු ද කඳවුරුවල හා කැළයේ රාත්‍රී කාලය ගෙවා දමයි. තමාගේ ජීවිතය මෙන්ම තම ඥාතීන්ගේ ජීවිත ද කොයි මොහොතක අහිමිවෙයි දැයි දිවා රෑ දෙකම මානසිකව විඳවමින් ජීවත් වීම පහසු නැත. එම ජීවිත දෙකම කටුකය දුෂ්කරය පීඩීතය. රූපවාහිනියෙන් යුද්ධය දැක වර්ණනා කරන මිනිසුන් නොදන්නා, නොදකිනා යථාර්ථය එයයි. දකුණේ හමුදා සෙබළා නිවාඩුවේ දී මිතුරන් සමග ඥාතීන් සමග විවේකයෙන් සිටිය හැකි වුවත් මායිම් ගම්මානයේ හමුදා සෙබළා මුළු ජීවිතයම යුද්ධයට කැපකොට ඇත. ඔහුට සිවිල් ජීවිතයක් නොමැති තරම් ය. ඔහුගේ ජීවිතය යුද්ධයට සින්න වී ගොස් ඇත. මිනිසෙකුට නොදැරිය හැකි මානසික පීඩනයක් බරක් සිත තුළ ගුලි කරගත් මිනිසුන් පිරිසක් ලෙස මොවුන් හඳුනාගත හැකිය.







මම මෙම තොරතුරු සොයාගනු ලැබූවේ කැබිතිගොල්ලෑව යකාවැව, කණුගහවැව ප්‍රදේවල මිනිසුන් සමග වසරක පමණ කාලයක් (මෙත් සහන පදනම) වැඩකටයුතු කිරීමෙනි. යුද්ධයෙන් ඔවුන්ට භෞතික මෙන්ම මානසිකව ද තුවාල වී ඇත. අහිමි වූ බොහෝ දේ නැවත ලබා ගැනීමට නොහැකි පරිදී අහිමි වී ඇත. මම දුටු විශේෂ කරුණ නම් දකුණේ අන්තවාදීන් මෙන් උතුරු මැද පළාතේ යුද්ධයට මැදි වූ මිනිසුන් අතර දෙමළ හෝ මුස්ලිම් භීතිකාවක් නොමැති අතර ඊට හේතුවී ඇත්තේ ඔවුන් එක ලෙසම යුද්ධයෙන් බැටකෑ මිනිසුන් හේතුවෙනි. එසේම, ෆේස්බුක් වැනි සමාජ ජාල වෙබ් අඩවි වලින් පතුරවන තොරතුරු දැන ගැනීමට දුරකථන ජාල ශක්තිමත් නොවීම ද එක් අතකට යහපතකි. ජාතීන් වශයෙන් නොව මිනිසුන් වශයෙන් සත්වයින් වශයෙන් ජීවීන් වශයෙන් සිතමින් හැම දෙනාට ම එකට ජීවත් විය හැකි සමාජයක් ගොඩනැගීම, හැමදෙනාගේම සිහිනය වූ දින මේ ලෝකය මීට වඩා සුන්දර වනු ඇත.


 




යටලමත්තේ කුසලානන්ද හිමි

 









0 comments: